ina om odu

ina om odu, nunu kopisuaian?

osorou ku di laid maso poimpasi poh todu ku (tina tapa ku), otogod yau sokiro lohouon yau ‘odu’. kada ponong’odu’, tu ‘tina’ oku ti dokoyu, ka dau moboros. tontok nopo di nga yoho gia paling tokoro mantad dahai mogiompinai. yoho paling tokoro, koubasanan dit ‘tina’ dahai dot manahak tusin ogumu. wokon onuan duo nohopod sen, yoho onuan oku limo nohopod sen. ogumu moti gia duo nohopod sen di laid, tu ongomura poh bobolion.

dalaan kinoubasan ku momolohou todu ku dot ‘ina’, jadi tambalut ku suai sokiro yolo momolohou tina diolo nga ‘ina’ ka diolo mamarait. osuaian oku tu noubasan ku gia monong’ina’ todu ku.

todu ku nopo tiso (tina tama ku), nga kinoubasan mantad momolohou todu. nga hali pia haro iso ‘tina’ om iso todu ku, amu oku kopisuai nunu kopio korotion ‘ina’. kaagu gia, sokiro nopo momolohou oku tama ku nga roiton ku ‘ama’, okon ko tina. kagayo oku poh om koilaai ku nogi nunu korotion ‘ina’.

gisom pia dondo, sokiro kopiboros nopo yahai mogiompinai (tompinai suai tapa ku), roiton kasari dahai ‘tina’, okon ko ‘todu’. laid noh napatai ‘tina’ ku, haro noh kanto 16 toun notoliban nga osorou ku kasari monong’ina’ dau.